მთავარი სიახლეები პროექტები ვიდეო/ფოტო რეგისტრაცია ბმულები
    მთავარი >> news >> პარლამენტში ოპოზიციის მომავალზე მსჯელობენ

გუშინ პარლამენტში რიგგარეშე სესიის სხდომა სახელმწიფო ჰიმნით გაიხსნა და პარლამენტის თავმჯდომარემ დავით უსუფაშვილმა კანონპროექტების განხილვის დაწყებამდე სიტყვა დეპუტატებს გადასცა.

მსჯელობის მთავარი საგანი არჩევნების შემდეგ საქართველოში ოპოზიციის ჩამოყალიბების საკითხი იყო. საპარლამენტო უმრავლესობის წევრი გია ჟორჟოლიანი 'ნაციონალურ მოძრაობას' ახალი პოლიტიკური პლატფორმის ჩამოყალიბებას ურჩევს. დეპუტატის თქმით, 'ნაციონალური მოძრაობა' და ასევე სხვა მმართველი პარტიები საქართველოში, იყვნენ არა ევროპული გაგებით პარტიები, არამედ საბჭოთა კავშირში არსებული ტრადიციის გამგრძელებლები.

გია ჟორჟოლიანის თქმით, როდესაც სახელისუფლებო პარტია მმართველობაში აღარ არის, ნორმალური ოპოზიციური პარტიის რეჟიმში ფუნქციონირება ძალიან უჭირს. როგორც ჟორჟოლიანი ამბობს, ცვლილებებმა საქართველოშიც და ასევე პოსტსაბჭოთა ქვეყნებშიც აჩვენა, რომ როცა ასეთი პარტიები ხელისუფლებიდან მიდიან, ისინი იშლებიან. 'სიამოვნებით შევხვდებოდი იმას, რომ 'ნაციონალურ მოძრაობას' პოლიტიკური პლატფორმა ჩამოეყალიბებინა, რომელიც მას ნორმალური ოპოზიციური პარტიასავით ფუნქციონირების შესაძლებლობას მისცემდა,' - ამბობს გია ჟორჟოლიანი. როგორც დეპუტატი აღნიშნავს, საქართველოში შეიძლება, ოპოზიციური განწყობები გაჩნდეს და თუ 'ნაციონალური მოძრაობა' პარტიაში ცვლილებებს ვერ შეძლებს, მის ადგილს სხვა დაიკავებს. 'ეს შეიძლება იყოს კოალიციის შიგნით ან მის გარეთ მყოფი პარტია,' - ამბობს გია ჟორჟოლიანი.

პარლამენტის ვიცე-სპიკერმა ზურაბ აბაშიძემ 'ნაციონალურ მოძრაობას რებრენდინგისკენ მოუწოდა.

'ბოლო ოცი წლის განმავლობაში, რაც საქართველო დამოუკიდებელია, პირველად მოგვიწია ამ რეალობაში ყოფნა, როცა არჩევნების გზით შეიცვალა ხელისუფლება. მესმის, რომ თქვენთვის მტკივნეულია და ფსიქოლოგიურად ამის გადალახვა პრობლემურია,' - მიმართავს აბაშიძე ოპონენტებს.

მას მიაჩნია, რომ 'ნაციონალური მოძრაობა' ლიდერისგან უნდა გათავისუფლდეს და ჯანსაღ ოპოზიციად იქცეს.

საპარლამენტო უმცირესობის წევრი დავით დარჩიაშვილი უმრავლესობის წევრ გია ჟორჟოლიანის გამოსვლას ეხმიანება და ამბობს, რომ საზოგადოებაში ოპოზიციურმა განწყობებმა მართლაც შეიძლება, მოიმატოს. ამასთან, დარჩიაშვილი 'ნაციონალური მოძრაობის' შესახებაც საუბრობს. 'კითხულობენ, 'ნაციონალურ მოძრაობას' რა პლატფორმა აქვს? მისი მნიშვნელოვანი ნაწილი კი დღესაც ისმის: არ შეიძლება ისეთი მნიშვნელოვანი თემით თამაში, როგორიც 'ახალქალაქი-ყარსის' რკინიგზაა. ჩვენს დასავლურ არჩევანს დღევანდელ თქვენს რიტორიკასა და ნაბიჯებში თუ რამე ეწინააღმდეგება, ერთ-ერთი მნიშვნელოვანი საკითხი ეს არის. პლატფორმის ნაწილია ის, რომ თვითმმართველობებზე ზეწოლა იმ ფორმით და ისეთმა სუბიექტებმა არ უნდა მოახდინონ, რომელთა შესახებაც შეიძლება პრეზიდენტსაც წამოცდეს გამოთქმა - წვერგაუპარსავი. სჯობს, ამ ქმედებებს მიაქციოთ ყურადღება, ვიდრე იმას, პრეზიდენტი რა სიტყვას გამოიყენებს. ახლა არ მინდა იმის შესახებ საუბარი, პრემიერ-მინისტრი რა სიტყვებს იყენებს,' - აღნიშნავს დავით დარჩიაშვილი.

უმცირესობის წევრის თქმით, მოვლენებსა და შინაარსობრივ საკითხებზე ყურადღების გამახვილება თანაარსებობის საფუძველი იქნება. დარჩიაშვილი პარლამენტში დავით უსუფაშვილის პირველ გამოსვლას იხსენებს და ახალ ხელისუფლებას შენიშვნებს აძლევს. 'დადებითად მენიშნა, როდესაც მან თქვა, რომ ყურადღება პროცედურულ დემოკრატიას მიექცევა. მაგრამ, დღეისთვის შექმნილ ვითარებაში ან დავით უსუფაშვილმა უნდა თქვას, რომ ზოგჯერ პროცედურულმა დემოკრატიამ შეიძლება უკან დაიხიოს და სხვა მნიშვნელოვან საკითხებს პროცედურები შევწიროთ, ან ყველამ ერთად განმარტეთ, წინა კვირას რა მოხდა,' - ამბობს დარჩიაშვილი, - 'ჩვენ ბიუჯეტის საკითხებზე მსჯელობაში მონაწილეობის საშუალება არ მოგვეცა, თუმცა ხუთშაბათს ამისთვის ვემზადებოდით, როდესაც თქვენი 'წვერგაუპარსავი ამომრჩეველი,' ბატონო ნუკრი, ფიზიკურ ანგარიშწორებაზე გადმოვიდა.'

დარჩიაშვილს უსუფაშვილმა მაშინვე უპასუხა: 'დიახ, ბატონო დავით, დემოკრატია მხოლოდ პროცედურული დემოკრატიაა. არაპროცედურული დემოკრატიის შედეგებს ვიმკით. ამ ფილოსოფიის გამო ბევრი რამ ვერ მოხერხდა. გპირდებით, რომ 4 წლის განმავლობაში არა მხოლოდ პრაქტიკულად, არამედ თეორიულადაც თქვენთან დისკუსიას დავასრულებთ. დარწმუნდებით, რომ დემოკრატია მხოლოდ პროცედურულია.'

პარლამენტის თავმჯდომარე დარჩიაშვილის კიდევ ერთი განცხადების შესახებ საუბრობს. 'გთხოვთ, ნუ წარმოაჩენთ ისე, თითქოს ამ დარბაზში საბიუჯეტო საკითხების განხილვაში მონაწილეობაში ვინმემ ხელი შეგიშალათ. მაშინ განაცხადეთ, რომ კონსულტაციები გსურდათ და დარბაზი დატოვეთ. ბიუჯეტის განხილვის დროს ამ ტრიბუნიდან მოგიწოდეთ, რომ ჩამობრძანებულიყავით და მუშაობა გაგვეგრძელებინა. მაგრამ, ეს თქვენი გადაწყვეტილება იყო. თქვენი უფლებაა, მოვლენები შეაფასოთ, მაგრამ როცა საქმე პარლამენტის მუშაობას ეხება და ფაქტებს ამახინჯებთ, ვალდებულად მივიჩნევს თავს, რომ ამას გამოვეხმაურო,' - თქვა უსუფაშვილმა.

სხდომათა დარბაზში, ბუნებრივია, ასევე აქტუალური იყო ბოლოდროინდელი დაკავებებისა და დაკითხვების თემა. ფრაქცია 'ერთიანი ნაციონალური მოძრაობის' თავმჯდომარე გოკა გაბაშვილის თქმით, უპრეცედენტო მოვლენაა, როცა დაკითხვაზე პარლამენტის ყოფილ წევრებს იბარებენ და კანონშემოქმედების შესახებ კითხვებს უსვამენ.

საპარლამენტო უმცირესობის წევრმა გიორგი კანდელაკმა ხელისუფლება შევარდნაძის დროინდელი მმართველობისთვის დამახასიათებელი სტილის გამო გააკრიტიკა. როგორც კანდელაკი ამბობს, მსგავსება განსაკუთრებით თვალშისაცემია საგარეო პოლიტიკაში. დეპუტატის თქმით, უკვე 10 წელი გავიდა გავიდა მას შემდეგ, რაც პრეზიდენტმა შევარდნაძემ ნატო-ში გაწვერიანების შესახებ ოფიციალური განაცხადი გააკეთა. როგორც კანდელაკი აღნიშნავს, მაშინ ამ ნაბიჯზე ყველას ეღიმებოდა, რადგან ამ დეკლარაციის მიღმა არანაირი ადეკვატური შინაარსი არ იდგა. კანდელაკი მოქმედ ხელისუფლებას მიმართას: 'თქვენც ნატო-ში გაწევრიანების შესახებ საუბრობთ, მაგრამ ამავდროულად ყველაზე დიდი, თქვენ მიერ გაუკონტროლებელი კერძო ტელეკომპანიის დირექტორს იჭერთ. თქვენ ევროპულ ოჯახში ინტეგრაციაზე საუბრობთ, მაგრამ ამავე დროს ევროპის საბჭოს საპარლამენტო ასამბლეის წინადადებას არ ითვალისწინებთ, რომელიც გარკვევით და ცხადად გთხოვთ, რომ პოლიტპატიმართა ე.წ. ბესელია-კაკაბაძის სია არ მიიღოთ. ჩემდა სამწუხაროდ, ქალბატონი ბესელია კვლავაც იმეორებს, რომ ევროსაბჭოს საპარლამენტო ასამბლეის კომიტეტი შეცდომაშია შეყვანილი. გარდა ამისა, 'საერთო სასამართლოების კანონში' ცვლილებების შესახებ ვენეციის კომისიის დასკვნას არ ელოდებით.'

პარლამენტმა  დავითაშვილის  კანონპროექტი  არ მიიღო

პარლამენტის სხდომის გარდა, გუშინ სხვადასხვა კანონპროექტებს კომიტეტები განიხილავდნენ. იურიდიულ საკითხთა და ადამიანის უფლებათა დაცვის კომიტეტებმა არ მიიღეს უმრავლესობის წევრ კობა დავითაშვილის მიერ ინიცირებული კანონპროექტი, რომელიც ნარკოტიკული საშუალებების მოხმარების დეკრიმინალიზაციას ითვალისწინებს. კანონპროექტის თანახმად, ნარკომომხმარებლების მიმართ მხოლოდ ადმინისტრაციული სანქციები უნდა იყოს გამოყენებული. თუმცა, კობა დავითაშვილი ფინანსური სანქციების გაზრდას ითხოვს.

კანონპროექტის თანახმად, ნარკოტიკული საშუალების მოხმარება პირველ ჯერზე ადმინისტრაციული წესით 300 ლარის ოდენობის უნდა ისჯებოდეს, განმეორების შემთხვევაში - 600 ლარით, ხოლო შემდეგ ჯერზე - 3 500 ლარის ან ადმინისტრაციული პატიმრობით 60 დღემდე ვადით.

დავითაშვილის ინიციატივა, არც საპარლამენტო უმრავლესობის და არც უმცირესობის წევრებმა არ გაიზიარეს. იურიდიულ საკითხთა კომიტეტის თავმჯდომარე ვახტანგ ხმალაძის თქმით, კანონპროექტი სათანადოდ მომზადებული არ იყო. ორივე კომიტეტის წევრებმა პლენარულ სხდომაზე კანონპროექტის გატანას მხარი არ დაუჭირა. თუმცა ამავდროულად ითქვა, რომ საკითხის სერიოზული შესწავლა აუცილებელია.

კომიტეტების პოზიციით უკმაყოფილო კობა დავითაშვილის თქმით, კომიტეტის წევრები კანონპროექტს არ გაეცნენ, მიუხედავად იმისა, რომ მათ ამისთვის საკმარისი ვადა ჰქონდათ.

გუშინ საკომიტეტო მოსმენისთვის ბოლო დღე იყო. პროცედურის მიხედვით, თუ კომიტეტი კანონპროექტს არ განიხილავს, შესაძლებელია პლენარულ სხდომაზე დოკუმენტის პირდაპირ გატანა. 'კომიტეტის სხდომა ჩემი მოთხოვნით ჩატარდა. თავი საერთოდ რომ დამენებებინა, დადებით დასკვნად ჩაითვლებოდა და პლენარულ სხდომაზე გატანას შევძლებდი. მაგრამ, მე პატიოსნად მოვიქეცი, მინდოდა, კომიტეტის წევრებს ემსჯელათ. ჩემი ამოცანა არ არის, რომ ეს კანონპროექტი გავაპარო, არამედ მინდა, სერიოზული მსჯელობა შედგეს,' - ამბობს კობა დავითაშვილი.

24 საათი

ე.შ

 

მსგავსი თემები
ქართული წარმომადგენლობები ეკლესია ქართული ორგანიზაციები ქართული ბიზნესი აშშ-ში ხელოვნება და სპორტი ჩვენს შესახებ კონტაქტი საქართველოს შესახებ Facebook - შემოგვიერთდით
ქართული სატელევიზიო არხები